चौंडीत मोठा गोंधळ; राम शिंदे यांच्या निवासस्थानाबाहेर पोलीस आणि शिंदे समर्थक आमनेसामने, धक्काबुक्कीची घटना

पोलिसांनी संयमाने भूमिका घेत समजावून सांगितले आणि सुरक्षेचे महत्व स्पष्ट केले. यावेळी अनेक शिवसेना पदाधिकारी प्रवेशद्वाराजवळच थांबले होते.

Police and Shinde supporters face to face : जामखेड येथे आज एका राजकीय कार्यक्रमानंतर अचानक तणावपूर्ण वातावरण निर्माण झाल्याची घटना समोर आली आहे. विधान परिषदेचे सभापती राम शिंदे यांच्या निवासस्थानासमोर पोलीस कर्मचारी आणि शिंदे समर्थकांत जोरदार वादावादी झाली, ज्यामुळे काही काळ परिस्थिती चिघळण्याची चिन्हे दिसून आली. गोदा ते नर्मदा पुण्यश्लोक अहिल्यादेवी होळकर जल यात्रा या कार्यक्रमानंतर राज्याचे उपमुख्यमंत्री एकनाथ शिंदे हे सभापती राम शिंदे यांच्या जामखेड येथील निवासस्थानी स्नेहभोजनासाठी दाखल झाले होते. या पार्श्वभूमीवर मोठ्या संख्येने शिवसेना पदाधिकारी आणि कार्यकर्ते देखील तेथे जमले होते.

दरम्यान, निवासस्थानाच्या प्रवेशद्वारावर पोलीस प्रशासनाने सुरक्षा कारणास्तव काहींना आत जाण्यास मज्जाव केला. यावरून संतप्त झालेल्या शिंदे समर्थकांनी पोलीस कर्मचाऱ्यांशी वाद घालण्यास सुरूवात केली. काही क्षणांतच ही वादावादी बाचाबाचीमध्ये रूपांतरित झाली आणि परिस्थिती अधिक तणावपूर्ण बनली. यावेळी दोन्ही बाजूंमध्ये धक्काबुक्की झाल्याचे देखील समोर आले आहे.

परिस्थिती हाताबाहेर जाण्याची शक्यता लक्षात घेता, जामखेडचे पोलीस निरीक्षक तातडीने घटनास्थळी दाखल झाले. त्यांनी दोन्ही गटांमध्ये मध्यस्थी करत परिस्थिती नियंत्रणात आणण्याचा प्रयत्न केला. पोलिसांनी संयमाने भूमिका घेत कार्यकर्त्यांना समजावून सांगितले आणि सुरक्षेचे महत्व स्पष्ट केले. यावेळी अनेक शिवसेना पदाधिकारी प्रवेशद्वाराजवळच थांबले होते. त्यांना देखील सुरूवातीला आत जाण्यास मज्जाव करण्यात आल्याने गोंधळात भर पडली. मात्र, पोलीस निरीक्षकांच्या हस्तक्षेपानंतर वातावरण हळूहळू शांत झाले.

अखेर समन्वय साधत, निवडक कार्यकर्ते आणि पदाधिकाऱ्यांना तसेच उपस्थित पत्रकारांना निवासस्थानात प्रवेश देण्यात आला. त्यामुळे मोठा अनर्थ टळला असून संभाव्य तणावपूर्ण परिस्थिती वेळेत नियंत्रणात आणण्यात पोलिसांना यश आले. या घटनेमुळे काही काळ परिसरात तणावाचे वातावरण निर्माण झाले होते, मात्र प्रशासनाच्या तत्परतेमुळे परिस्थिती लवकर सुरळीत झाली.

संबंधित बातम्या